ອົງການຊາຍຟັນ ປະຈຳ ສປປ ລາວ ຮ່ວມກັບ ກະຊວງສຶກສາທິການ ແລະ ກິລາ ໂດຍສະເພາະແມ່ນ ສູນການສຶກສາຮຽນຮ່ວມ, ໂຄງການຮ່ວມມືກັບອົງການຈັດຕັ້ງສາກົນຂອງລັດຖະບານອົດສະຕຣາລີ (ANCP) ແລະ ສະມາຄົມຊ່ວຍເຫຼືອເດັກນ້ອຍພິການ (ACDA) ໄດ້ຮ່ວມມືກັນຈັດຕັ້ງປະຕິບັດໂຄງການສົ່ງເສີມການສຶກສາຮຽນຮ່ວມ (BOIL) ເຊິ່ງເປັນໂຄງການໄລຍະ 3 ປີ ທີ່ມີເປົ້າໝາຍເພື່ອເຮັດວຽກຮ່ວມກັບບັນດາຄູ, ພະນັກງານດ້ານການສຶກສາ, ເດັກນ້ອຍພິການ ແລະ ຄອບຄົວຂອງເຂົາ, ແລະ ຊຸມຊົນທີ່ກ່ຽວຂ້ອງ ເພື່ອຮັບປະກັນວ່າ ໂຮງຮຽນມີຄວາມຮູ້, ມີບຸກຄະລາກອນ ແລະ ໂຄງສ້າງທີ່ເຂົາເຈົ້າຕ້ອງການ ເພື່ອໃຫ້ເດັກຍິງ, ເດັກຊາຍ ລວມທັງເດັກນ້ອຍພິການ ໄດ້ເຂົ້າເຖິງການສຶກສາຮຽນຮ່ວມທີ່ມີຄຸນນະພາບ. ໂຄງການນີ້ຍັງໄດ້ສ້າງສະພາບແວດລ້ອມດີຈີຕ້ອນໃຫ້ເດັກນ້ອຍພິ ການ ເພື່ອໃຫ້ເຂົາເຈົ້າສາມາດເຂົ້າເຖິງການສຶກສາໄດ້ຫຼາຍຮູບແບບ ແລະ ມີຄວາມປອດໄພໃນການໃຊ້ສື່ທາງອອນໄລນ໌.

ທ່ານ ບິຈູ ອັບຣາຮາມ, ຫົວໜ້າອົງການຊາຍຟັນປະຈໍາ ສປປ ລາວ ໄດ້ກ່າວວ່າ: “ເດັກນ້ອຍພິການແມ່ນໜຶ່ງໃນກຸ່ມຄົນທີ່ຂາດໂອກາດ ແລະ ຍັງບໍ່ໄດ້ຮັບການສະໜັບສະໜູນຢ່າງກວ້າງຂວາງເທົ່າທີ່ຄວນ. ການແຜ່ລະບາດຂອງພະຍາດ ໂຄວິດ-19 ອາດຈະເຮັດໃຫ້ເຂົາເຈົ້າມີຄວາມສ່ຽງຫຼາຍຂຶ້ນຍ້ອນວ່າ ເຂົາເຈົ້າອາດຈະຕ້ອງປະເຊີນກັບການຢູ່ໂດດດ່ຽວ, ການຖືກກີດກັ້ນ, ການເຂົ້າເຖິງການບໍລິການດ້ານການແພດທີ່ໜ້ອຍລົງ, ແລະ ອາດມີຄວາມສ່ຽງຕໍ່ການຖືກເອົາປຽບຫຼາຍຂຶ້ນ. ໂຄງການສົ່ງເສີມການສຶກສາຮຽນຮ່ວມ ຫຼື BOIL ຈະຮັບປະກັນການລວມເອົາ ເດັກນ້ອຍພິການເຂົ້າໃນລະບົບການສຶກສາເພື່ອທີ່ເຂົາເຈົ້າຈະໄດ້ຮັບການສຶກສາຢ່າງເທົ່າທຽມກັນ, ພວກເຂົາຈະບໍ່ຖືກ ປະປ່ອຍໄວ້ຢູ່ເບື້ອງຫຼັງ.”

ໂຄງການສົ່ງເສີມການສຶກສາຮຽນຮ່ວມມີຈຸດປະສົງເພື່ອສ້າງຂີດຄວາມສາມາດໃຫ້ໂຮງຮຽນ ແລະ ຄູເພື່ອສ້າງສະພາບ ແວດລ້ອມການຮຽນທີ່ມີຄຸນນະພາບໃຫ້ແກ່ເດັກຍິງ ແລະ ເດັກຊາຍທີ່ມີຄວາມຕ້ອງການການຮຽນທີ່ແຕກຕ່າງກັນລວມທັງເດັກນ້ອຍພິການ. ນອກຈາກນັ້ນ, ອົງການຊາຍຟັນ ແລະ ຄູ່ຮ່ວມງານ ຍັງຈະເຮັດວຽກຮ່ວມກັບພໍ່ແມ່, ຜູ້ດູແລ, ຄູ, ແລະ ຜູ້ນໍາຊຸມຊົນ ເພື່ອວາງແຜນ, ຕິດຕາມກວດກາ, ແລະ ສະໜັບສະໜູນການສຶກສາຮຽນຮ່ວມໃຫ້ມີຄຸນນະພາບຢູ່ໃນ ສປປ ລາວ ນຳອີກ.