ໂຄງການປະສົມປະສານເພື່ອຄວາມເຕີບໂຕທາງດ້ານໂພຊະນາການ (IN4G) ມີຈຸດປະສົງຫຼັກເພື່ອເສີມສ້າງໂພຊະນາການຂອງເດັກນ້ອຍລາວທີ່ມີອາຍຸຕ່ຳກວ່າ 2 ປີ, ໂດຍເນັ້ນໃສ່ການປັບປຸງການເປັນຢູ່ທີ່ດີ ແລະ ສຸຂະພາບຂອງເດັກໃນ 1000 ວັນທຳອິດຂອງເຂົາເຈົ້າ. ເວົ້າສະເພາະແລ້ວ, ໂຄງການ IN4G ໄດ້ຖືກອອກແບບມາເພື່ອປັບປຸງການປະຕິບັດດ້ານສຸຂະພາບ, ໂພຊະນາການ ແລະ ສຸຂະອະນາໄມ ໃນລະດັບບ້ານ ແລະ ຊຸມຊົນ, ເສີມສ້າງຄວາມເຂັ້ມແຂງໃຫ້ແກ່ສະຖານທີ່ບໍລິການສຸຂະພາບທີ່ເປັນທາງການ ເພື່ອສະຫນອງການບໍລິການທີ່ມີຄຸນນະພາບດີກວ່າເກົ່າ ຕາມຄວາມຕ້ອງການຂອງຊຸມຊົນ, ແລະ ສົ່ງເສີມການພັດທະນາ ແລະ ການປະຕິບັດນະໂຍບາຍດ້ານໂພຊະນາການ ໂດຍຜ່ານການຝຶກອົບຮົມ ແລະ ການໂຄສະນາຂອງອົງການຊາຍຟັນ.

ໂຄງການ IN4G ຈັດຕັ້ງປະຕິບັດຢູ່ ເມືອງ ຊຳເໜືອ, ແຂວງ ຫົວພັນ, ແລະ ຈະດຳເນີນໄປຮອດເດືອນມິຖຸນາ 2024. ໂຄງການໄດ້ກຳນົດ 10 ບ້ານເປົ້າໝາຍ ໂດຍຜ່ານການປຶກສາຫາລືຫຼາຍຄັ້ງກັບຊຸມຊົນ, ເມືອງ ແລະ ແຂວງ. ຜູ້ທີ່ໄດ້ຮັບຜົນປະໂຫຍດໂດຍກົງຈາກໂຄງການແມ່ນແມ່ຍິງຖືພາ, ເດັກນ້ອຍອາຍຸຕ່ຳກວ່າ 5 ປີ ແລະ ນັກຮຽນມັດທະຍົມຕອນຕົ້ນ ທັງໝົດປະມານ 897 ຄົນ. ໃນຂະນະທີ່ຜູ້ໄດ້ຮັບຜົນປະໂຫຍດທາງອ້ອມບັນລຸປະມານ 3.724 ຄົນ (ຍິງ 1.727 ຄົນ, ຊາຍ 1.997 ຄົນ).

ທ່ານ ວິລະໄຊ ທຳມະວົງ, ຮັກສາການຫົວໜ້າອົງການ ຊາຍຟັນ ປະຈຳ ສປປ ລາວ ໄດ້ກ່າວວ່າ: “ຄວາມເປັນຢູ່ ແລະ ການພັດທະນາຂອງເດັກນ້ອຍ, ໄວໜຸ່ມ ແລະ ຊຸມຊົນໃນເຂດເປົ້າໝາຍຂອງພວກເຮົາ ແມ່ນບູລິມະສິດທີ່ສຳຄັນຂອງວຽກງານຂອງອົງການຊາຍຟັນສະເໝີ. ດ້ວຍການແຜ່ລະບາດຂອງພະຍາດໂຄວິດ-19 ແລະ ສິ່ງທ້າທາຍອື່ນໆທີ່ພວກເຮົາໄດ້ປະເຊີນມາຈົນເຖິງປັດຈຸບັນ, ເດັກນ້ອຍ ແລະ ໄວໜຸ່ມແມ່ນມີຄວາມສ່ຽງ ແລະ ຕ້ອງການຄວາມຊ່ວຍເຫຼືອຫຼາຍຂຶ້ນ. ທີມງານ ອົງການຊາຍຟັນ ຂອງພວກເຮົາມີຄວາມພາກພູມໃຈຢ່າງຍິ່ງທີ່ໂຄງການນີ້ຈະໃຫ້ການສະໜັບສະໜູນແກ່ແມ່ ແລະ ເດັກນ້ອຍຫຼາຍຂຶ້ນ ໂດຍສະເພາະແມ່ຍິງຖືພາ, ເດັກນ້ອຍອາຍຸຕ່ຳກວ່າ 5 ປີ ແລະ ນັກຮຽນມັດທະຍົມຕອນຕົ້ນ. ເຊິ່ງວຽກງານທັງໝົດຂອງ ອົງການ ຊາຍຟັນ ປະຈຳ ສປປ ລາວ, ມີຈຸດປະສົງປະກອບສ່ວນເພື່ອບັນລຸວິໄສທັດຂອງພວກເຮົາທີ່ວ່າ: ໂລກທີ່ປາສະຈາກຄວາມທຸກຍາກ ບ່ອນທີ່ເດັກນ້ອຍ ແລະ ໄວໜຸ່ມ ສາມາດເວົ້າໄດ້ວ່າ: ຂ້ອຍໄດ້ຮັບການປົກປ້ອງ. ຂ້ອຍໄດ້ຮັບການສຶກສາ. ຂ້ອຍມີສ່ວນຮ່ວມ. ຂ້ອຍມີອະນາຄົດທີ່ສົດໃສ.”