ໃນວັນທີ 18 ມັງກອນ 2023 ທີ່ ຫ້ອງປະຊຸມພະແນກສາທາລະນະສຸກແຂວງຫົວພັນ, ອົງການຊາຍຟັນ ປະຈຳ ສປປ ລາວ ໄດ້ຈັດກອງປະຊຸມຄະນະກຳມະການຄຸ້ມຄອງການຈັດຕັ້ງປະຕິບັດໂຄງການປະຈຳປີ 2022
ໃນວັນທີ 18 ມັງກອນ 2023 ທີ່ ຫ້ອງປະຊຸມພະແນກສາທາລະນະສຸກແຂວງຫົວພັນ, ອົງການຊາຍຟັນ ປະຈຳ ສປປ ລາວ ໄດ້ຈັດກອງປະຊຸມຄະນະກຳມະການຄຸ້ມຄອງການຈັດຕັ້ງປະຕິບັດໂຄງການປະຈຳປີ 2022 ເຊິ່ງໃຫ້ກຽດເປັນປະທານຮ່ວມໃນພິທີໂດຍ ທ່ານ. ດຣ. ອຸ້ຍມີໄຊ ສີບຸນເຮືອງ, ຮອງຫົວໜ້າພະແນກສາທາລະນະສຸກແຂວງຫົວພັນ, ແລະ ທ່ານ ວິລະໄຊ ທຳມະວົງ, ຮັກສາການຫົວໜ້າອົງການຊາຍຟັນ ປະຈຳ ສປປ ລາວ – ຝ່າຍແຜນງານ.
ນອກຈາກນັ້ນ, ກໍ່ຍັງມີຕາງໜ້າຈາກກະຊວງສາທາລະນະສຸກ; ກະຊວງສຶກສາທິການ ແລະ ກິລາ; ກະຊວງການຕ່າງປະເທດ; ພະແນກການທີ່ກ່ຽວຂ້ອງ; ອົງການຊາຍຟັນ ອົດສະຕຣາລີ; ອົງການນຊາຍຟັນເກົາຫຼີ; ຮອງເຈົ້າເມືອງເມືອງຊຳເໜືອ, ເມືອງສົບເບົາ, ແລະ ເມືອງຫົວເມືອງ; ຄູ່ຮ່ວມງານພາກສ່ວນສະມາຄົມ; ແລະ ທີມງານໂຄງການ ຂອງອົງການຊາຍຟັນ ປະຈຳ ສປປ ລາວ ກໍ່ໄດ້ໃຫ້ກຽດເຂົ້າຮ່ວມ.
ພາຍໃນກອງປະຊຸມ ທັງ 4 ໂຄງການລວມມີ ໂຄງການປະສົມປະສານເພື່ອຄວາມເຕີບໂຕທາງດ້ານໂພຊະນາການ (IN4G), ໂຄງການສົ່ງເສີມການສຶກສາຮຽນຮ່ວມ (BOIL), ໂຄງການສົ່ງເສີມຄວາມເປັນເຈົ້າການກ່ຽວກັບສິດທິດ້ານການສຶກສາ (PAER), ແລະ ໂຄງການສ້າງຄວາມເຂັ້ມແຂງດ້ານບົດບາດຍິງ-ຊາຍ ແລະ ການຮຽນຮູ້ດ້ານພາສາ ໃຫ້ແກ່ນັກຮຽນຊົນເຜົ່າ (GLEESE) ໄດ້ຜັດປ່ຽນກັນຂຶ້ນນຳສະເໜີເນື້ອໃນລາຍລະອຽດໂຄງການ, ສະຫຼຸບການຈັດຕັ້ງປະຕິບັດກິດຈະກຳໃນປີ 2022 ແລະ ຜົນທີ່ໄດ້ຮັບ, ນຳສະເໜີແຜນການຈັດຕັ້ງປະຕິບັດກິດຈະກຳໃນປີ 2023, ແລະ ສະຫລຸບງົບປະມານທີ່ຍັງເຫຼືອໃຫ້ພາກລັດ ແລະ ຄູ່ຮ່ວມງານໄດ້ຮັບຟັງ.
ນອກຈາກນັ້ນ, ພາຍໃນງານກອງປະຊຸມກໍ່ຍັງມີການສະແດງຄວາມຄິດເຫັນ ແລະ ແລກປ່ຽນຂໍ້ມູນວິຊາການເຊິ່ງກັນ ແລະ ກັນ ເພື່ອເປັນການປັບປຸງ ແລະ ຊອກຫາວິທີແກ້ໄຂຂໍ້ຄົງຄ້າງເພື່ອໃຫ້ການດຳເນີນກິດຈະກຳ ໃຫ້ເກີດປະໂຫຍດສູງສຸດສໍາລັບຊຸມຊົນ.
