ໃນເດືອນ ສິງຫາ 2022 ທີມງານໂຄງການ, ຊຶ່ງນໍາໂດຍ ນ. ມິນລາ ນານທະວົງ, ຫົວໜ້າແຜນງານສຶກສາ ອົງການຊາຍຟັນ ປະຈໍາ ສປປ ລາວ ຮ່ວມກັບ ວິຊາການຈາກ ຫ້ອງການສຶກສາທິການ ແລະ ກິລາເມືອງ 3 ເມືອງ: ເມືອງ ຫົວເມືອງ, ເມືອງ ຊໍາເໜືອ ແລະ ເມືອງ ສົບເບົາ ໄດ້ຈັດກອງປະຊຸມທົບທວນຄືນເຄື່ອງມື, ຫຼັກສູດ ແລະ ວິທີການໃນການນໍາພາ ຄະນະພັດທະນາການສຶກສາຂັ້ນບ້ານ (ຄພສບ) ແລະ ຊຸມຊົນ ປຶກສາຫາລື ແລະ ສ້າງແຜນພັດທະນາການສຶກສາຂັ້ນບ້ານ. ນອກຈາກນັ້ນ, ຄພສບ, ນັກຮຽນ ແລະ ຊຸມຊົນ ຍັງໄດ້ລົງຈັດຕັ້ງປະຕິບັດຕົວຈິງກ່ຽວກັບຂະບວນການນໍາພາ ແລະ ວາງແຜນພັດທະນາວຽກງານການສຶກສາໃນຂັ້ນບ້ານ ໂດຍເອົາຕົວເດັກ ແລະ ຊຸມຊົນເປັນຫຼັກໃນການສະເໜີສິ່ງທີ່ຕ້ອງການພັດທະນາ. ດ້ວຍວິທີການດັ່ງກ່າວ, ທຸກຄົນຈະສາມາດປະກອບສ່ວນເຂົ້າໃນແຜນພັດທະນາການສຶກສາ. ແລະພວກເຮົາຈະສາມາດຮັບປະກັນວ່າເດັກທຸກຄົນຈະໄດ້ຮັບການສຶກສາທີ່ມີຄຸນນະພາບທີ່ຈະຊ່ວຍໃຫ້ພວກເຂົາບັນລຸເປົ້າຫມາຍແລະຄວາມຝັນຂອງພວກເຂົາໄດ້.

ອົງການຊາຍຟັນ ປະຈໍາ ສປປ ລາວ ໂຄງການສົ່ງເສີມຄວາມເປັນເຈົ້າການກ່ຽວກັບສິດທິດ້ານການສຶກສາຢູ່ເມືອງ ຫົວເມືອງ ແລະ ເມືອງ ຊໍາເໜືອ, ແຂວງ ຫົວພັນ, ຊຶ່ງເປັນໂຄງການທີ່ໄດ້ຮັບທຶນຊ່ວຍເຫຼືອລ່າຈາກ ສະຫະພາບເອິຣົບ ໃນການສົ່ງເສີມວຽກງານດ້ານສິດທິຕ່າງໆເຊັນ: ສິດທິເດັກ, ສິດທິມະນຸດ ແລະ ສິດທິດ້ານການສຶກສາ, ນອກຈາກນີ້ໂຄງການຍັງໄດ້ສ້າງຄວາມເຂັ້ມແຂງຫຼາຍດ້ານໃຫ້ແກ່ ຄພສບ, ອສບ ໃນຂັ້ນບ້ານເຊັນ: ສົ່ງເສີມທັກສະດ້ານການວາງແຜນພັດທະນາວຽກງານການສຶກສາໃນຂັ້ນບ້ານ, ຄວາມຮູ້ກ່ຽວກັບສິດທິເດັກ, ສິດທິມະນຸດ, ສິດທິຄົນພິການ ແລະ ການສົ່ງເສີມວຽກງານການສຶກສາຮຽນຮ່ວມໃນຂັ້ນບ້ານ.